Kur të gjithë prisnin që autoritetet të reagonin për humbjen e jetës së një qytetari të pafajshëm në Kavajë, ndodh çudia. Drejtori i Departamentit për Sigurinë Publike, Drejtues i Lartë Gjovalin Loka do të bënte këtë të premte një deklaratë që i ngjasonte asaj të ministres Elisa Spiropali “këto ndodhin dhe nëpër filma”.
Pikërisht drejtori i Departamentit për Sigurinë Publike zgjodhi të flasë për nivelin e zhurmave në zonat bregdetare.
“Nisur nga disa ankesa të ardhura në adresë të Policisë së Shtetit gjatë muajt Qershor 2019, për prishje të qetësisë së pushueseve si pasojë e muzikës së lartë që gjenerojnë lokale të ndryshme, jo vetëm në zonën bregdetare, por edhe në zona të tjera urbane, si dhe në zbatim të porosive të lëna në takimin e fundit nga Kryeministri i vendit dhe Ministri i Brendshëm, me drejtuesit qendrorë dhe vendorë të Policisë, për reagim të menjëhershëm të Policisë së Shtetit lidhur me këtë, Policia e Shtetit ju bën thirrje të gjitha subjekteve që ushtrojë biznes disko, lokale nate, apo me muzikë “LIVE”, që të respektojnë në mënyrë rigoroze kufizimet e orareve dhe të ndotjes akustike në mjedis sipas përcaktimeve të bëra në aktet ligjorë që janë ora 23:00 në ditët e javës dhe ora 24:00 në fundjavë”, tha Gjovalin Loka.
“Policia e Shtetit do të ushtrojë kontroll të pandërprerë dhe do të marrë masa të menjëhershme në funksion të shqetësimeve të ngritura nga qytetarët dhe pushuesit në zonat bregdetare e ato urbane, duke ndëshkuar sipas akteve ligjore në fuqi, çdo subjekt që gjeneron zhurmë tej normave të lejuara”, theksoi më tej ai.
Ramazan Hasanlliun, mesditën e së enjtes, shkoi të blinte bukën si zakonisht në furrën pranë lagjes. Por 52-vjeçari nuk u kthye dot në shtëpi dhe të çonte bukën në familje. Ai u gjet rastësisht në mesin e breshërive të armëve, pas një konflikti që kishin nisur me një grup të rinjsh një natë më parë./ Opinion.al
