Qytetarët janë ngritur dhe kanë vendosur nderin në vend. Kjo është sinteza e asaj çfarë mund të nxirret nga protesta e sotme në Rrugën e Kombit, ku dhjetra qytetarë dolën për të kundërshtuar çmimin e lartë të pagesës së vendosur nga qeveria socialiste.
Mirëpo, protesta doli jashtë kontrollit dhe protestuesit pasi u përleshën me forcat e policisë, kanë shkatërruar edhe koncesionarin e ngritur për pagesën e taksës, duke i vënë flakën.
Protestuesit janë futur edhe brenda sporteleve dhe kanë shkatërruar edhe kompjuterët.
Protestuesit kanë goditur me gurë punonjësit e policisë, të cilët vendosën një kordon para për të penguar dëmtimin e vendit ku bëhet pagesa. Protestuesit kanë thyer xhamat në sportelet për pagesën e taksës.
Nga përplasja mes policisë dhe protestuesve mësohet se ka edhe persona të lënduar. Agjentët në terren janë duke bërë verifikimet dhe do të nisin procedim për disa nga protestuesit.
Më herët, policia bllokoi automjetet që vinin nga Kosova për t’u bashkuar në protestën kundër vendojes së taksës për Rrugën e Kombit.
