Grupe të qytetarëve serbë protestuan në fshatin Rudarë, Komuna e Zveçanit, kundër, siç thanë, “kërcënimeve” të kryeministrit të Kosovës, Albin Kurti.
Në këtë vend, i cili në mesin e komunitetin lokal serb njihet edhe si “Te kryqi”, ndodhet një prej barrikadave të ngritura në veri të Kosovës qysh më 10 dhjetor.
Në protestë morën pjesë edhe pjesëtarë të komunitetit serb nga zona të tjera të Kosovës.
Bëhet fjalë kryesisht për persona të punësuar në institucionet serbe që funksionojnë në Kosovë.
Në fillim të protestës, foli djali i Dejan Pantiçit, Predrag Pantiç, si dhe ish-kryetari i Gjykatës Themelore në Mitrovicë, Nikola Kabashiç, ish-kryetari i Komunës së Zveçanit, Dragisha Miloviç dhe të tjerë nga sektori i arsimit dhe drejtësisë.
Ata thanë se duan paqe, duan të qëndrojnë dhe të mbijetojnë në Kosovë, se nuk kanë asgjë kundër popullit shqiptar, por janë kundër Qeverisë së Albin Kurtit. Ata i dënuan arrestimet në veri dhe dërgimin e njësive speciale të Policisë së Kosovës në atë pjesë të Kosovës.
Qëllimi i arrestimeve, sipas tyre, ishte “frikësimi” i popullit serb.
Kryetari i Komunës së Shtërpcës, Dalibor Jevtiç, nga radhët e Listës Serbe, tha se “në këtë luftë, serbët janë të bashkuar”. Ai tha se qëllimi i Kurtit është që të mos ketë serbë në jug dhe në veri të Ibrit, ose të ketë “vetëm nga ata që duan t’i përulen”.
Protesta, që u cilësua si “më e madhja ndonjëherë”, u organizua pas thirrjes së të ashtuquajturit Shtab i krizave, i cili përbëhet nga punonjës të institucioneve të Serbisë në Kosovë dhe përfaqësues të Listës Serbe – partisë më të madhe të serbëve në Kosovë, e cila vepron me mbështetjen e Beogradit zyrtar.
Policia e Kosovës, nga ana tjetër përmes një komunikate për media, i ftoi qytetarët që “të kenë vëmendje dhe kujdes të shtuar” gjatë protestës.
Ndërkaq si rezultat i situatës janë shtuar edhe forcat e KFOR-it dhe EULEX-it.
Misioni i sundimit të ligjit në Kosovë, EULEX, ka njoftuar se janë duke e monitoruar situatën në veri të Kosovës dhe thanë se kanë shtuar praninë në terren për shkak të situatës të sigurisë atje.
