Ndërsa para Kryeministrisë qytetarët po protestojnë kundër rritjes së çmimeve, kryeministri Edi Rama ka dalë në një reagim live në rrjetin e tij “Facebook”, pikërisht për shqetësimin e ditëve të fundit.
Ai tha se i ka ndjekur reagimet dhe shqetësimet e qytetarëve në rrjetin e tij social “Facebook”. Rama tha se ngritja e çmimit të naftës rrit natyrshëm edhe valën e shqetësimit te qytetarët.
“Kur më shan hajdut, thjesht shoh një hajdut më shumë që shan se më ka mësuar Kanti kush të shan pa prova ose e ka bërë vetë, ose është gati ta bëjë vetë. Në jetën time nuk jam përkulur kurrë për të futur dorën në xhepin e askujt dhe kam kuptuar se lekë në varr nuk bën punë sa dheu. Problemi themelor në situata të tilla është bashkimi, i kam ndjekur me shumë vëmendje reagimet dhe komentet e tua, qysh pas konferencës kur folëm me shifra për thellimin e krizës dhe masat tonë. Çmimi i naftë rritet duke ngritur natyrshëm valën e shqetësimit”,-tha Rama.
