Qytetarët i kërkojnë kryeministrit Rama, transparencë mbi stadiumin Qemal Stafa, në truallin e të cilit ai ka dhënë leje që të ngrihet një kullë private. I kërkojnë të dinë nëse se kush përfiton më shumë nga stadiumi, ata apo biznesmeni që po ndërton kullën dhe që sipas opozitës është njeri i kryeministrit. Teksa këto shqetësime vazhdon t’i lërë pa përgjigje, kryeministri po shpik shqetësime imagjinare. Ai thotë në fejsbukun e tij se po u shkruan atyre që shqetësohen përse po investohet për qendrat e qyteteve. Në të vërtetë për këto investime nuk ka patur ndonjë shqetësim veç kritikave kur ka pasur dyshime për mënyrën e përdorimit të fondeve apo mospëlqim për projektet si në rastin e Durrësit ku qytetarët thonë se pllakat prej mermeri e kanë bërë të pamundur qëndrimin në shesh vetës nga dielli që djeg e vjeshtës e dimrit nga shiu që i ben pllakat të rrëshqitshme.
Postimi i Ramës:
KOMENTUESVE QE THONE PSE QENDRAT E QYTETEVE(?)…
…dëshiroj t’u them se 23 vjet u fillua kuturu çdo mandat, kap këtu një rrugë, riparo aty një copë ujësjellësi, hap andej një kanal e hidh matanë ca asfalt ose zhavorr dhe ja ku e gjetëm, pas çerek shekulli jo fshatrat s’iu afruan qyteteve, po qytetet u bënë si katunde të frikshme! Apo jo?!
Ndërkohë Programi Kombëtar i Rilindjes Urbane ka nisur prej aty ku ka nisur çdo qytetërim apo nga ku ka rinisur çdo epokë apo kapitull i ri zhvillimi social e urban: Nga qendrat e qyteteve, të cilat janë qendra e gravitetit të bashkëjetesës komunitare, zemra që mban lidhur të gjitha arteriet e një njësie të organizuar shoqërore. Dhe prej aty programi po vijon të shtrihet në arteriet kryesore e, me patjetër do të prekë, pjesë – pjesë, çdo zonë të banuar të bashkive të reja që krijoi reforma historike e administrimit të territorit, fshat më fshat. E di që shumë njerëz janë lodhur duke pritur 25 vjet që ky ndryshim real e i prekshëm që po ndodh sot në zonat qendrore të qyteteve tona, të ndodhte në lagjen a në fshatin e tyre apo në rrugën që lidh shtëpinë e tyre me qendrën e qytetit! Kanë shumë të drejtë. Po çfarë të bëjmë sot?!
Nuk besoj që edhe më të verbërit, ta besojnë vërtetë se është mëkati i kësaj qeverie që në raport më zhvillimin urban të territoreve bashkiake, e ka nisur punën aty ku, në fakt, puna duhet të kishte nisur 25 vjet më parë! Nëse ju e imagjinoni me siguri ku do të ishin sot edhe fshatrat, po të kishte filluar puna si duhet, me rend logjik, para 25 vjetësh, ju siguroj se unë e di shumë mirë se ku do të ishim 25 vjet nga sot po të vazhdonim arrno këtu e arrno atje! Pra do të humbisnim edhe 25 vjet të tjera në këtë drejtim, siç humbëm 25 vitet që çanë e ikën. Ashtu sikundër e shoh si dritën e diellit ku do mbërrijmë jo shumë, po 10 vjet më tutje, në rrugën që jemi nisur :)
Prandaj punë pa u lodhur, durim pa humbur logjikën dhe natyrisht sakrifica pa harruar qëllimin. Sepse, nëse një gjeneratë u rrit në një vend pa qytete në kuptimin më të thjeshtë të hapësirës publike e sociale, gjenerata tjetër meriton të ketë Shqipërinë e saj të qytetëruar Europiane, që fizikisht nis pikërisht nga qendra e bashkisë Dhe do ta ketë padiskutim
#Rilindje#ShqipëriaeGjeneratësTjetër
