Nga Dritan Laci
Nëse është e vërtete kjo është e tmerrshme. Madje është akoma edhe më keq. Është pabesi dhe pafytyrësi. Madje ca më keq akoma, është Tradhëti Kombëtare. Lajmi i publikuar në edicionin qendror informativ të lajmeve në Tv Klan se 1400 kontenierë me mbetje radioaktive të ardhura nga Italia me destinacion Maqedoninë janë zhdukur pa nam e nishan në Shqipëri pasi kanë hyrë në Portin e Durrësit është i kobshëm.
Fillimisht sepse bëhet fjalë për lëndë të rrezikshme për shëndetin e banorëve; e dyta sepse nuk ka humbur një bidon me cianur por plot 1400 kontenierë me lëndë te rrezikshme dhe e treta edhe më e frikshme sepse kjo zhdukje misterioze është mbajtur e fshehur nga institucionet përgjegjëse shtetërore. Ku përgjegjësinë më të madhe në këtë rast për këtë e ka qeveria tashmë e zhytur në skandale të njëpasnjëshme. Është kjo qeveri që duhet të dalë menjëherë në një deklarim për shtyp dhe të informojë fillimisht nëse është apo jo i vërtetë lajmi i zhdukjes së 1400 kontenierëve me lëndë të rrezikshme. Nëse po, pse është mbajtur I fshehtë ky lajm. Dhe këtë duhet të dalë dhe ta bëjë vetë kryeministri Rama siç doli në vitin 2014 dhe u tha shqiptarëve që protestonin kundër ardhjes së armëve kimike, se nuk do importeshin të tilla në Shqipëri.
Rama sot duhet të dalë dhe të thotë ato fjalë që tha në konferencën e 3 viteve më parë ku u thoshte shqiptarëve “Që nuk do tradhëtonte kurrë për asnjë interes a çmim dhe nuk do të bënte asgjë që do të cënonte asnjë fije të jetës, të sigurisë apo ardhmes së shqiptarëve”. Ndaj Rama duhet të dalë dhe tu thotë shqiptarëve si është e vërteta e zhdukjes së 1400 kontenierëve me lëndë të rrezikshme. Ku kanë përfunduar? Është prodhim i medias së kazanit apo një skandal ku duhet llogari një orë e më parë qeveria e tij?/Opinion.al
