TIRANË- Çmimi i naftës pritet të rritet sërish. Shkak është bërë një tarifë e re që Qeveria vendos për licencimin e pikave të shitjes së karburanteve. Në vendimin e marrë më 2 dhjetor, pagesa përcaktohet 5 milionë lekë për Bashkinë e Tiranës dhe 2 milionë lekë për bashkitë e tjera. Tarifat e mëparshme ishin 30 mijë lekë për Bashkinë e Tiranës dhe 20 mijë lekë për bashkitë e tjera. Ky vendim e rrit me 170 herë çmimin e licensës apo të përsëritjes së saj.
E gjithë kjo do të përkthehet në barrë për konsumatorët, si një tjetër taksë e fshehur brenda çmimit të karburanteve. Kështu pritet që konsumatorët ta paguajnë më shtenjtë karburantin për mjetet e tyre.
Me “taksën” e re, çmimi, thonë ekspertët mund të rritet deri në 10 lekë për litër. Revista Monitor shkruan se pjesës më të madhe të 1200 pikave të tregtimit të karburanteve u ka mbaruar licensa dhe duhet ta rinovojnë atë. 1200 pikat përllogaritet të paguajnë nga 3.5 deri në 4.2 miliardë lekë apo rreth 25- 30 milionë euro për rinovimin e licensave.
Kjo kosto pritet të reflektohet te çmimi i karburanteve, si kosto shtesë për konsumatorët. Qeverisë i është kërkuar prej kohësh të ulë taksat që ajo i mbledh përmes çmimit të karburantit. Shtesa e kësaj “takse” shkon diametralisht në krah të kundërt me këto kërkesa.
