Kryeministri Edi Rama, ministrja e Arsimit, Lindita Nikolla dhe ai i Financave, Arben Ahmetaj kanë mbajtur një ligjëratë të gjatë para një grup mësuesish sot në kishën ortodokse aty ku u zhvillua takimi dhe që u transmetua në TV përmes regjisë së kryeministrisë.
Aktiviteti nisi në 11:30 dhe përfundoi në 12:30, ku 30 minuta foli vetëm Rama. Ata transmetuan lajmin e mirë për rritjen e pagave të mësuesve, gjë që ndodh pas 2 vitesh. Rritja është 10 për qind mbi pagën aktuale dhe nis të shpërndahet prej datës 1 Marsit 2017.
“Të dashur mësues, ju meritoni respektin maksimal. Qeveria ka vendosur që krahas mbështetjes me trajnim, qeveria ka vendosur që padyshim t’ju mbështesë edhe me rritjen e pagave. Do të jetë ministri i Financave që do të tregojë se sa dhe si do të rriten pagat për mësuesit dhe pedagogët, pedagogët që nuk kanë shënuar rritje page që nga viti 2005”.
Më pas ishte ministri i Financave, Arben Ahmetaj që theksoi se, ‘kjo nuk është rritje page, por reformë në administratën publike, reformë e drejtpërdrejtë në sistemin e arsimit”.
“Rritja do jetë 10% dhe për herë të parë në 7-8 vite do kalojnë në rritje reale. Në 2017 kërcejmë në inflacionin akumulativ me 2% plus”, tha ai.
Ndersa Rama tha se “rritja e rrogës që kemi projektuar, duke filluar nga 1 marsi i vitit tjetër është rritje reale mbi inflacionin e parashikuar, përfitojnë 34 mijë e 630 punonjës në arsim që marrin 18 mln dollarë nga 100 mln i përgjithshëm. Përfitojnë jo veç mësuesit, por edhe pedagogët. Në sistemin Universitar nuk është prekur rroga që nga 2005, e pakonceptueshme”, shtoi ai.
