Pavarësisht shifrave të ulëta për dy tremujorët e parë të vitit, ministrja e Ekonomisë dhe Financave, Anila Denaj ka deklaruar se rritja e ekonomisë në Shqipëri do të vazhdojë me rimin 4% për tre vitet e ardhshme.
“Rritja ekonomike e synuar në nivelin e 4% në tre vitet në vijim; ulja në vijim e nivelit të papunësisë përtej nivelit më të ulët historik të realizuar në 11.5 % në tremujorin e fundit, kërkon jo vetëm konsolidim fiskal, por edhe politika ekonomike sektoriale aty ku burimet natyrore, avantazhet konkurruese dhe potenciali i madh i kapacitetit human kërkojnë gërshetim strategjish për të mundësuar një rritje ekonomike të strukturuar në nivel afatmesëm.” tha Denaj gjatë mbledhjes së Këshillit të Investimeve.
Ajo shtoi gjithashtu se përmes reformave po synohet tërheqja e më shumë investitorëve duke përmendur si shembull rritjen e aktivitetit të bizneseve në fushën e Informacionit dhe Komunikimit.
Banka Botërore dhe Fondi Monetar Ndërkombëtar nënvizuan se rritja ekonomike pritet të jetë e moderuar gjatë 2019, rreth 3.5%. Por gjatë dy tremujorëve të parë ekonomia është rritur vetëm me 2.3%, sa gjysma e objektivit të qeverisë.
Kjo është shkaktuar kryesisht nga ulja e prodhimit të energjisë elektrike, mbyllja e kompanive të basteve por edhe performanca e dobët e institucioneve të tatimeve dhe doganave. Një tjetër indikator për të cilin ministrja nuk foli ishte rënia e investimeve private që shihet tek kalimi në vlera negative i formimit bruto të kapitalit fiks. /Opinion.al
