Pas refuzimit nga gjykatat italiane të dërgimit në Shqipëri të emigrantëve, qeveria në Romë po shqyrton mundësinë e shndërrimit të tyre në kampe riatdhesimi për azilkërkuesit e refuzuar.
Kryeministrja Giorgia Meloni pritet ta dekretojë këtë plan në mbledhjen e qeverisë të parashikuar për të Premten.
Planin e bëri të ditur në një invervistë për shtypin italian, ministri i Brendshëm Matteo Piantedosi, i cili shprehet se në kompleksin Shëngjin-Gjadër do të dërgohen azilkërkuesit, të cilëve u është refuzuar e drejta për të qëndruar në Itali, pasi nuk përmbushin kriteret.
Ndërkohë mediat italiane shkruajnë se sekretarja e Partisë Demokratike, Elly Schlein, në një intervistë të publikuar sot nga La Stampa, konfirmoi hipotezën e ndryshimit të drejtimit të dy qendrave në Shqipëri, të cilat deri tani kanë mbetur të papërdorura.
“Legjislacioni aktual europian”, shpjegon Schlein në përgjigje të hipotezës së rikonvertimit të paraqitur nga ministri, “nuk lejon që një qendër riatdhesimi të zhvendoset në një vend të tretë.
Njëra nga dy qendrat, në Shëngjin, nuk është e pajisur për strehim dhe për këtë arsye tashmë do të ishte gati për t’u mbyllur.
“Për Melonin dhe Piantedosin, objektivi i qendrave në Shqipëri ishte që të kishin një efekt ‘frenues’ për emigrantët, tani po na shpjegojnë se do të na dërgojnë vetëm njerëz që janë tashmë në Itali.
Ne nuk do të rrimë e të shikojmë ndërsa shkelin të drejtat e njeriut dhe hedhin më shumë para për të mbuluar dështimin e tyre, ndërsa Partia e tyre mbyll sekretin shëndetësor dhe sigurinë”, u shpreh Schlein.
