Qeveria holandeze do të shkojë në seancën plenare të së martës me opinionin se çelja e negociatave të anëtarësimit me Shqipërinë është e parakohshme. Në një letër drejtuar parlamentit, kabineti qeveritar mirëpret hapat e ndërmarra nga Shqipëria gjatë vitit të fundit, por thekson se ka ende shumë punë për të bërë sa i takon luftës kundër korrupsionit dhe krimit të organizuar.
“Qeveria mirëpret hapat që Shqipëria ka ndërmarrë tashmë në fushën e vetting-ut radikal, në sundimin e ligjit, rritjes së operacioneve policore kundër krimit. Por Shqipëria duhet të bëjë më shumë në luftën kundër krimit të organizuar. SPAK duhet të jetë sa më shpejt funksional dhe Shqipëria të tregojë një rekord bindës në luftën kundër krimit të organizuar dhe korrupsionit. Për të përfunduar, Qeveria mendon se hapja tani e negociatave është e parakohshme” thuhet në letër.
Aty përmendet gjithashtu opinioni pozitiv i Gjermanisë dhe vendeve të tjera anëtare të Bashkimit Europian në lidhje me Shqipërinë. Megjithatë nuk thuhet shprehimisht se Holanda do të bllokojë negociatat me Shqipërinë.
Më 15 tetor, ministrat e jashtëm të vendeve anëtare të BE-së do të mblidhen për të vendosur për këtë çështje dhe nëse ata nuk dalin në një vendim atëherë gjithçka do ti mbetet në dorë krerëve të shteteve anëtarë në mbledhjen e tri ditëve më vonë. /Opinion.al
