Kryeministri në detyrë i Malit të Zi, Dritan Abazoviç, i ka dorëzuar detyrën kreut të ri të qeverisë, Milojko Spajiç. Këtë gjë e ka bërë të ditur vetë Abazoviç, përmes një postimi në rrjetin social “Facebook”.
“Siç diktojnë sjelljet demokratike, mëngjesin e sotëm është bërë transferimi i detyrës! I urova fat Kryeministrit të ri dhe qeverisë së re”, ka shkruar Abazoviç.
Qeveria e re u votua në orët e para të së martës pas debateve që zgjatën gjatë gjitha natës. Deputetët e Kuvendit të Malit të Zi kanë votuar pro 46 deputetë, kundër 19 dhe një abstenoi.
Në seancën e Kuvendit mori pjesë edhe presidenti i Malit të Zi, Jakov Milatoviç.
Ndërsa sa i përket partive shqiptare, Nik Gjeloshaj është zëvendëskryeministër për Politikat Ekonomike dhe Ministër i Zhvillimit Ekonomik, Fatmir Gjeka është ministër për të Drejtat e Njeriut dhe Minoriteteve dhe Marash Dukaj është Ministër i Administratës Publike.
