Deri para disa muajsh Kryeministri Edi Rama dhe ish-ministri Saimir Tahiri e mohonin se vendi ishte kanabisuar duke i quajtur trillime të PD. Por tashmë jo vetëm që është shpallur 2017-ta, viti antikanabis por po hartohen edhe strategji të reja për ta luftuar.
Zv.Kryeministri Niko Peleshi nga selia e qeverisë deklaroi se “po hartojmë një dokument strategjik që do të udhëheqë përpjekjen ndërinstitucionale kundër kultivimit dhe trafikimit të kanabisit në vendin tonë”.
Peleshi njoftoi se do ishte vetë kryesues i grupit të punës ku do ketë ekspertë nga të gjitha institucionet. Në këtë proces janë përfshirë edhe shumë ekspertë nga BE dhe organizata dhe vende të tjera partnere. Nëpërmjet këtij plani qeveria shqiptare parashikon marrjen e të gjitha masave për parandalimin e kultivimit dhe trafikimit të kanabisit në vend.
Kjo strategji e qeverisë për të luftuar drogën vjen në kohën kur PD proteston në shesh pikërisht nga frika se zgjedhjet mund të blihen me paratë e drogës. Për kanabizimin e vendit kanë folur edhe eksponentë të LSI dhe kryesisht, Ylli Manjani.
/R.Dedaj-Opinion.al
