Një grua është shoqëruar nga policia në Tiranë pas një incidenti të regjistruar gjatë një aktiviteti ku ishte i pranishëm kryeministri, Edi Rama. Mësohet se policia e ka shoqëruar gruan për shkak se i ka prishur qetësinë kryeministrit Rama.
Ngjarja ka ndodhur në datën 15 tetor në rrugën “Fuat Toptani” ku policët e komisariatit nr. 1 kanë marrë njoftim nga Garda e Republikës për të shoqëruar një grua që kishte prishur qetësinë e Ramës, e identifikuar si Teuta Baçi me orgjinë nga Dibra dhe banuese në Tiranë.
Ka qenë gazetarja Anila Hoxha, e cila ka publikuar në rrjetin social Facebook, edhe raportin e mbajtur nga policia lidhur me rastin.
Baçi ka deklaruar se në momentin që është shoqëruar nga autoritetet po dilte nga puna e saj tek Kalaja e Tiranës, kur ka dëgjuar kryeministrin të thoshte diçka që nuk e kishte kuptuar dhe ka nisur të qeshte.
Por, e qeshura duket se nuk është pritur mirë nga kryeministri, gjë e cila ka shkaktuar reagimin e Gardës që i kërkoi policisë shoqërimin e saj./ Opinion.al
