Qershori do të mbyllet me temperatura përvëluese. Sipas parashikimeve të sinoptikanëve, prej ditës së martë vendi do të goditet nga vala e të nxehtit afrikan.
“Valët e të nxehtit afrikan pritet të godasin Shqipërinë edhe gjatë kësaj jave të fundit të qershorit, duke bërë që ditët që na presin të jenë edhe ditët më të nxehta të qershorit. I afrohet vlerës së 40 gradëve në disa zona të Shqipërisë, në qarkun Elbasan, Berat dhe Shkodër. Kryesisht do të jenë zonat mbi Shkodrën me temperatura mjaft të larta,” tha sinoptikania Lajda Porja.
Temperaturat do të arrijnë në gati 40 gradë në disa qytete. Ndërsa qytetarëve u këshillohet të shmangin daljet në orët e pikut dhe të qëndrojnë të hidratuar.
“Orët e pikut, padiskutim do të jenë rreth orës 10:30–11:00 deri në orën 14:00. Ky do të jetë edhe intervali ku do të shënohen temperatura mjaft të larta.”
Sipas parashikimeve, vala e të nxehtit pritet të vazhdojë edhe në ditët e para të korrikut, duke sjellë një verë me temperatura ekstreme dhe thatësirë. Klan News
