Në një atmosferë të ngrohtë dhe plot gjallëri, fshati piktoresk Godolesh, i vendosur mes kodrave të gjelbra të Elbasanit, hapi mbrëmjen e djeshme dyert për vizitorët me festën tradicionale “Qershi dhe Dashuri”. Kjo ngjarje ka si synim të promovojë bukuritë natyrore, produktet vendase dhe mikpritjen karakteristike të zonës.
Të rinj, të moshuar, banorë vendas dhe vizitorë nga qytetet përreth u mblodhën për të festuar së bashku nën hijen e pemëve të qershisë, në një ngjarje ku tradita takohet me dashurinë për natyrën dhe kulturën.
Festa u shoqërua me panaire të produkteve bio, ku qershia, simboli i zonës, mbizotëronte në çdo formë: e freskët, e konservuar, në reçel apo likere artizanale. Nuk munguan as gatimet tradicionale, veshjet karakteristike popullore të Godoleshit dhe muzika popullore që e kthyen ditën në një mozaik emocionesh dhe kujtimesh të bukura.
Vetë fermerët e Godoleshit u shprehën tepër të kënaqur me ecurinë e tregut këtë vit, që sipas tyre ka qenë më i mirë se vitet e kaluara. Tregtarët po e marrin një kilogram qershi nga fermerët me 300 lekë/kg, çmim që, sipas tyre, reflekton cilësinë e lartë të frutit dhe që pritet të mbetet i qëndrueshëm.
“Jemi shumë të kënaqur me çmimin këtë vit. Qershia është me cilësi shumë të mirë, dhe tregu ka qenë i gjallë që në fillim. Shpresojmë të vazhdojë kështu edhe në ditët në vijim.”
Për banorët e zonës, festa ishte një mundësi e shkëlqyer për të promovuar më tej fshatin e tyre dhe për të treguar punën që bëjnë gjatë vitit në kujdesin ndaj qershisë. Ata theksojnë se Bashkia Elbasan duhet të ketë një kalendar më të pasur me aktivitete kulturore dhe turistike gjatë gjithë vitit.
“Na vjen mirë që ka aktivitete të tilla. Godolesh ka shumë për të ofruar dhe ngjarje si kjo e promovojnë vërtet bukurinë dhe punën tonë. Do të donim të shihnim më shumë aktivitete të tilla nga bashkia.”
Festa “Qershi dhe Dashuri” tashmë është kthyer në një ngjarje vjetore, duke forcuar lidhjet mes komunitetit dhe duke sjellë një impuls të ri për zhvillimin lokal dhe qëndrueshmërinë ekonomike të zonës. Klan News
