Deputet i Partisë Demokratike, Gazment Bardhi, në një dalje për mediat këtë të premte, ka publikuar vendimin e Gjykatës së Posaçme të Shkallës së Parë, për kryebashkiakun e Mallakastrës, Qerim Ismailaj, i cili rezulton të jetë i shpallur fajtor për veprën penale “Falsifikimi i vulave, stampave ose i formularëve” dhe është dënuar nga GJKKO me 6 muaj burgim, por në aplikim të nenit 63 të Kodit Penal i është pezulluar dënimi me burgim dhe i është vendosur detyrimi për kryerjen e një pune me interes publik.
Bardhi tha se KQZ në rastin e Ismailajt, shkeli ligjin e dekriminalizmit pasi nuk duhej ta kishte regjistruar në zgjedhje kandidatin e PS, i cili rezulton të jetë i denuar.
Më tej, Bardhi theksoi se sipas ligjit të dekriminalizmit një personi të dënuar i ndalohet të ushtrojë funksione publike apo të kandidojë në zgjedhje, deri në periudhën e rehabilitimit.
“Qerim Ismailaj ishte i dënuar me tre vite burg në Greqi. Edhe pse e mohoi, prokuroria dhe gjykata vërtetuan se denoncimi i PD ishte i vërtetë dhe se ishte një ish- i dënuar me tre vite në Greqi dhe se i ishte fshehur autoriteteve atje. Në muajin shkurt GJKKO e gjeti fajtor Edi Ramën e Mallakastrës, Qerim Ismailaj, duke e dënuar për falsifikim të formularëve me 6 muaj. Celibashi dhe Këshilli i Ministrave duhej të kishin urdhëruar shkarkimin e menjëhershëm nga detyra. Ky urdhër nga kushtetuta e ligji nuk u ndërmor as nga Celibashi as nga Këshilli i Ministrave. Me një akt të paprecedentë, në injorim të thirrjeve të SHBA për kandidatë të pastër e të padënuar dhe jo me precedent, vendosën të rikandidojnë Isamailajn për bashkinë e Mallakastrës.
KQZ në shkelje të ligjit të dekriminalizimit ka konfirmuar kandidaturën e tij. Ky vendim gjykate që është pranuar edhe nga vetë Ismailaj se nuk është ankimuar, dhe sipas gjykatës ka marrë formë të prerë, i ndalon atij kandidimin. Periudha e ndalimit nënkupton që Ismailaj nuk mund të ushtojë detyrën në asnjë institucion apo kandidat deri në periudhën e rehabilitimit që përfundon më 29 mars 2025. I jemi drejtuar KQZ duke e vënë në dijeni për shkeljen flagrantë të ligjit të dekriminalizmit, injorim të deklaratave të partnerëve, duke i kërkuar të rishohë dhe të zbatojë ligjin e dekriminalizmit. Brenda ditës depozitojmë ankim në KAS”, tha Bardhi.
Kujtojmë se Ismailaj u mor i pandehur nga GJKKO pasi akuzohej se kishte fshehur një dënim me 3 vite burg në Greqi, të ndodhur 21 vite parë. Ai akuzohej për falsifikim të formularit të dekriminalizimit.
Denoncimi për këtë rast është bërë nga Partia Demokratike./Opinion.al
