Operacioni i kërkim-shpëtimit në Durrës vazhdon në rrënojat e hotelit “Mira Mare” që la pas tërmeti i 26 nëntorit.
Ekipet që janë duke punuar në zonë dyshojnë se poshtë gërmadhave mund të ketë ende njerëz.
Drejtuesi i grupit malazez thotë se qeni i tyre nuhati diçka dhe për këtë arsye, kërkimet në hotelin “Mira Mare” nuk janë ndërprerë ende.
“Këtu është një skuadër nga Mali i Zi, Serbia dhe Maqedonia e Veriut. Po përpiqemi të shohim në brendësi të kësaj ndërtese pasi nuk dimë saktësisht nëse ka viktima apo njerëz që mund të ndodhen ende nën ndërtesë. Natën e kaluar, qeni zbuloi diçka, por nuk dimë me saktësi çfarë është. Po vazhdojmë të kërkojmë dhe po përpiqemi të shohim në brendësi. Është e vështirë pasi e gjithë ndërtesa është e shkatërruar. Por gjithsesi do të shohim në brendësi sot”, thotë anëtari malazez i ekipit të emergjencave.
Deri tani bilanci i viktimave të tërmetit ka shkuar në 49 nga të cilat 22 në Thumanë dhe 27 në Durrës. Qindra banorë të tjerë janë plagosur dhe shumë godina janë dëmtuar dhe kërkojnë ndërhyrje të menjëhershme. Vala e tërmeteve që goditi Shqipërinë ka shkaktuar një gjendje të madhe paniku kryesisht tek banorët e zonave afër epiqendrës. Megjithatë forca e pasgoditjeve ka ardhur në rënie cka tregon për një stabilizim të situatës.
Më herët ministrja e Mbrojtjes, Olta Xhacka bëri thirrje që qytetarët, banesa e të cilëve është e dëmtuar, mos të qëndrojnë brenda tyre por të drejtohen tek vendet e strehimit deri në momentin e verifikimit të dëmeve. /Opinion.al
