Dy ministra të Qeverisë së Kosovës, Dardan Gashi, ministër për Diasporë dhe Investime Strategjike si dhe Endrit Shala, ministër i Tregtisë dhe Industrisë janë ndëshkuar me gjobë nga Gjykata Themelore e Gjakovës, pasi kanë qëlluar me armë. Në këtë rast është dënuar edhe ish-deputeti i Partisë Demokratike të Kosovës, Sami Lushtaku.
Gjyqtari Njazi Morina ka thënë se të dënuarit janë të detyruar që të paguajnë dënimet në afat prej 15 ditësh. “Endrit Shalën, (Gjykata) e dënon me dënim gjobë në shumën prej 2400 eurosh, të cilin dënim është i detyruar ta paguajë brenda afatit kohor prej 15 ditësh, pas plotfuqishmërisë së këtij aktgjykimi nën kërcënimin e përmbarimit të detyruar”, ka thënë Morina.
Ministri Gashi është dënuar më 1700 euro gjobë, njësoj dhe ish-deputeti i Kuvendit të Kosovës, Sami Lushtaku. Dy ministrat dhe ish-deputeti pranuan fajësinë duke thënë se kishin qëlluar armë në një gëzim. Ky rast ka ndodhur në muajin maj të vitit të kaluar./ Opinion.al
