Është kapur nga policia autori i ngjarjes së ndodhur mbrëmë në fshatin Petovë, të Fierit. Policia ka informuar se është vënë në pranga 30-vjeçari, me precedent të mëparshëm penal në fushën e krimeve kundër jetës dhe pronës, i cili gjuajti me armë zjarri në drejtim të një automjeti të parkuar.
Mësohet se është sekuestruar arma e krimit automatik, si dhe një thikë dhe municion luftarak.
Mbrëmjen e djeshme, në fshatin Petovë, Fier, shtetasi A.(M). Ç., 30 vjeç, pas një konflikti për motive të dobëta me shtetasin M. S., pasi qëlloi me armë zjarri automatik në drejtim të automjetit tip “Ford” në pronësi të shtetasit M. S., 64 vjeç, është larguar nga vendngjarja.
Pas disa orësh ndjekjeje është bërë e mundur ditën e sotme kapja e tij dhe gjetja e armës me të cilën ka gjuajtur 30-vjeçari.
30-vjeçari akuzohet për veprat penale “Kanosja”, “Shkatërrimi i pronës”, “Prodhimi dhe mbajtja pa leje e armëve dhe municionit luftarak” dhe “Mbajtja pa leje e armëve të ftohta”.
Mësohet se shtetasi A.(M). Ç., 30 vjeç, ka qenë i dënuar më parë për vjedhje me armë e kryer në bashkëpunim.
Materialet do i kalojnë Prokurorisë Pranë Gjykatës së Shkallës së Parë Fier, për veprime të mëtejshme procedurale./Opinion.al
