Një 30-vjeçar është arrestuar nga Forcat e Posaçme “Shqiponja” dhe shërbimet e Komisariatit të Policisë Nr. 2 në Tiranë, në kuadër të operacionit policor të koduar “Arratia”.
Gjatë këtij operacioni, në rrugën “Frang Bardhi”, oficerët e Policisë kanë ndaluar automjetin tip “Benz”, me drejtues shtetasin B. P., 30 vjeç. Gjatë kontrollit, në çantën e 30-vjeçarit, u gjetën dhe u sekuestruan në cilësinë e provës materiale, një armë zjarri pistoletë dhe municion luftarak, si dhe një leje drejtimi e dyshuar e falsifikuar.
Pas verifikimeve të kryera, ka rezultuar se i riu ishte shpallur në kërkim, për një ngjarje të ndodhur në mars të vitit 2021, në Shkodër, pasi ka qëlluar me armë zjarri, në drejtim të dy vëllezërve M. D. dhe H. D.
Në mars 2021 janë arrestuar edhe dy vëllezërit, pasi janë konfliktuar me shtetasin B. P. Materialet i kaluan Prokurorisë, për veprime të mëtejshme./Opinion.al
