Policia e Librazhit ka parandaluar ditën e sotme një ngjarje të mundshme kriminale.
Uniformat blu kanë vënë në pranga një 42-vjeçar, pasi qëlloi me armë gjahu, në ajër, gjatë një konflikti me fqinjin e tij, për motive pronësie.
Nga kontrollet është sekuestruar arma e gjahut me të cilën qëlloi 42-vjeçari dhe municion luftarak.
“Menjëherë pas njoftimit se në fshatin Gizavesht, një shtetas kishte qëlluar me armë gjahu, në ajër, shërbimet e Komisariatit të Policisë Librazhd kanë shkuar në vendngjarje, me qëllim parandalimin e një ngjarjeje të mundshme kriminale dhe arrestimin e autorit.
Si rezultat i veprimeve të shpejta operacionale, u kap në flagrancë dhe u vu në pranga shtetasi S. Xh., 42 vjeç.
Ky shtetas dyshohet se gjatë një konflikti për motive pronësie, me fqinjin e tij, shtetasin H. Xh., 80 vjeç, në fshatin Gizavesht, ka qëlluar me armë gjahu, në ajër, për ta kanosur atë.
Nga të shtënat nuk ka patur shtetas të dëmtuar.
U sekuestruan në cilësinë e provës materiale, arma e gjahut dhe një sasi municioni luftarak, që posedoheshin pa leje”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme./Opinion.al
