Altin Isaraj, vëllai i ish-deputetit socialist Arben Isaraj, është arrestuar nga policia pasi ka shtënë me armë pa leje. Sipas njoftimit të policisë, kanë qenë banorët të cilët kanë njoftuar autoritetet se dikush po qëllonte me armë. Efektivët kanë bërë të mundur arrestimin në flagrancë të 48-vjeçarit, i cili për më tepër ishte në arrest shtëpie sepse po hetohet për vepra të tjera penale.
“A. I., 48 vjeç, banues në Tiranë (me masë sigurie “arrest shtëpie”). Në sallën operative ka ardhur telefonatë nga qytetarët se në rrugën e rezervave të shtetit është qëlluar në ajër me armë zjarri nga një mjet. Shërbimet e policisë në bazë të karakteristikave të dhëna kanë bërë ndalimin e mjetit me drejtues shtetasin A. I., dhe pasagjer shtetasit R. E., 15 vjeç dhe E. E., 27 vjeç (vëllezër)”, njofton policia.
Altin Isaraj është në proces gjyqësor për veprat penale të trafikimit të armëve dhe shpërndarjes së lëndëve narkotike. Ai është vëllai i ish-deputetit socialist Arben Isaraj. Ky i fundit mbante postin e Drejtorit të Transportit Rrugor Shqiptar, por dha dorëheqjen nga kjo detyrë pas çështjes gjyqësore që u hap ndaj vëllait të tij në vjeshtën e vitit të kaluar. Arben Isaraj në atë kohë deklaroi se po jepte dorëheqjen për arsye morale dhe për të mos ndikuar në procesin gjyqësor./Opinion.al
