Një 28- vjeçar shqiptar është vrarë me thikë mbrëmjen e djeshme në Greqi.
Sipas mediave greke, autorët e kësaj ngjarjeje të rëndë janë dy kushërinj të tij, vëllezër të moshës 17 dhe 19 vjeç.
Sipas informacioneve, dy vëllezërit kishin bërë një takim me 28-vjeçarin, i cili kishte ardhur së fundmi në Greqi nga Shqipëria.
Ata pretendojnë se kur kanë qenë fëmijë, 28-vjeçari i ka abuzuar seksualisht në Shqipëri. Kur u takuan, ata debatuan për atë që pretendojnë se ka ndodhur në të kaluarën. Viktima ka tentuar t’i qetësojë, por ka ndodhur një sherr, i cili ka sjellë plagosjen fatale të 28-vjeçarit.
Ngjarja ka ndodhur rreth orës 22:50 kur efektivët e Policisë Rrugore, të cilët po lëviznin pranë kryqëzimit të rrugëve Chania dhe Patisia, panë të rrëzuar përtokë 28-vjeçarin Denis Loka.
Menjëherë është lajmëruar ambulanca dhe i plagosuri është transportuar në spitalin “Evangelismos”, ku ka humbur jetën.
Rreth një orë pas ngjarjes, dy vëllezërit janë paraqitur në komisariatin e Kipselit dhe kanë rrëfyer se kanë vrarë 28-vjeçarin.
17-vjeçari ka treguar në polici se ka qenë ai që ka plagosur për vdekje 28-vjeçarin, ndërsa 19-vjeçari ka qenë bashkëpunëtor.
