Të shtëna me armë zjarri janë regjistruar këtë të martë në Vlorë. Policia informon se rreth orës 10:00, në spitalin e Vlorës, ka shkuar një person, i cili është plagosur me armë zjarri, në rrethana ende të paqarta.
Sipas A2 plagosja ka ndodhur pranë bibliotekës në këtë qytet, ndërsa personi i plagosur është identifikuar si Marion Mitro.
“Gjatë krehjes së zonës, në aksin rrugor Vlorë- Selenicë, nga shërbimet e Policisë është konstatuar duke u djegur një automjet i braktisur i markës “Land Rover”, i cili paraprakisht dyshohet se mund të jetë i autorit të ngjarjes”, njofton policia.
Ndërkohë vijon krehja e zonës nga shërbimet e DVP Vlorë, për identifikimin dhe kapjen e autorit. Kujtojmë se Mitro ka qenë pjesë e dosjes së “tritolit” të Julian Sinanit. Rreth një vit më parë ai ka dalë nga burgu. Pjesë e kësaj dosje ka qenë edhe Erjon Mëhillaj, i cili vrau veten në burg./Opinion.al
