Qazim Sejdini mbyll zyrtarisht ciklin e tij në krye të Elbasanit. Kryeministrit Edi Rama këtë të shtunë gjatë takimit për “Bashkinë që duam” tha se “Qazimi po e mbyll me nder dhe me një gjurmë që do mbetet përgjithmonë në kujtesën për qytetin”.
“Ka qëndruar 12 vjet në kryer të bashkisë. 6 vjet i ka pasur me Saliun, 6 vjet me mua. Nëse shikoni se sa mbështetje ka marrë në 6 vitet e para, me 6 vitet e dyta, shifra është 10 herë më e lartë në këto 6 vitet e dyta. Qazimi po e mbyll me nder dhe me një gjurmë që do mbetet përgjithmonë në kujtesën për qytetin, ju kam thënë na jepni besimin se ne do bëjmë për Elbasanin për 4 vite sa nuk është bërë për 10 vite”, tha Rama, ndërsa kandidati i PS për Elbasanin do të jetë Gledian Llatja.
Kryeministri sërish ka bërë një koment për opozitën dhe protestën duke i bllokuar rrugën, për ta penguar të shkojë në Elbasan. Protestën Rama e cilësoi shfaqje rrugaçërie.
“Si mundet një parti politike që kërkon të marrë pushtetin, të bllokojë rrugën dhe me bllokimin e tyre thotë se po lufton për demokraci. Sa i dehur duhet të jesh t’i besosh këta. Ata që u kanë dhënë llogari, pasi u dhanë votën jenë në parlament dhe jo për ta kthyer parlamentin si një kopsht pa drek, duke u dhënë shembullin më të keq të gjitha klasave të Shqipërisë. Ti nuk je popull duke nxjerrë disa të verbër të bllokojnë rrugët. Ti nuk je popull, por je një shërbëtor i tij deri sa të ka zgjedhur si deputet”, tha Rama, që theksoi se një marrëveshje të dytë si ajo e 2017 ku opozitës iu dha gjysma e qeverisë nuk do të ketë.
Përgjigje Rama iu dha dhe zërave kritikë brenda PS-së që kërkojnë një marrëveshje me opozitën dhe që qeveria të ndryshojë qëndrim.
“Kam dëgjuar dhe nga njerëzit tanë që këtu do gjendet një zgjidhje, se këtu do shtyhen zgjedhjet. Më 30 qershor në këtë shesh i gjithë Elbasani do të falënderojë Qazim Sejdinin dhe do të urojë pasardhësin e tij”, tha Rama. Gjatë seancës së 3 prillit, ish-ministri i Jashtëm, Ditmir Bushati në fjalën e tij në Parlament u bë zëri i parë në radhët e grupit parlamentar që kritikoi Ramën për arrogancën ndaj kundërshtarëve politikë. /Opinion.al
