Tre persona kanë rënë në prangat e policisë në Tiranë pasi qarkullonin me armë zjarri pistoletë në automjet dhe dy mjete të forta çekiçë.
Efektivët e Forcës së Posaçme “Shqiponja”, në bashkëpunim me ato të Komisariatit të Policisë Nr. 3, bazuar dhe në informacionet e siguruara nga inteligjenca informative, kanë organizuar dhe finalizuar operacionin policor të koduar “Almak”.
Si rezultat i këtij operacioni u bë arrestimi i shtetasve: Klejdi Yzeiraj, 35 vjeç, Enton Mehmeti, 41 vjeç, dhe Amarildo Nazari, 32 vjeç, të tre banues në Tiranë.
Gjatë operacionit, në rrugën “Muzakët”, shërbimet e Policisë kanë lokalizuar dhe ndaluar automjetin me drejtues Amarildo Nazari, dhe pasagjerë shtetasit Klejdi Yzeiraj, dhe Enton Mehmeti. Në momentin e ndalimit, Enton Mehmeti, ka kanosur punonjësit e Policisë. Gjatë kontrollit fizik të shtetasit Klejdi Yzeiraj, shërbimet e Policisë i kanë gjetur një armë zjarri pistoletë dhe municion luftarak, për të cilën drejtuesi i automjetit, Amarildo Nazari, ka dhënë deklaratë të rreme, se arma ishte e tij.
Në cilësinë e provës materiale u sekuestrua arma e zjarrit pistoletë me krehër me 6 fishekë, një automjet, dhe dy çekiçë, të gjetura gjatë kontrollit të automjetit.
Vijon puna për zbardhjen e qëllimit të mbajtjes së armës së zjarrit dhe sendeve të forta, nga 3 të arrestuarit./Opinion.al
