Përfaqësuesi i Partisë Socialiste në Këshillin Politik, Damian Gjiknuri është shprehur se ai nuk mund të firmosë letra të njëanshme, duke iu referuar 5 pyetjeve që Opozita e Bashkuar dorëzoi sot në Këshillin Politik që t’i dërgohen OSBE/ODIHR-it.
Sipas Gjiknurit, propozimet e opozitës janë vazhdim i retorikës politike.
“Pres propozimet tuaja konkrete për amendamentet…Tek ODIHR dërgohen mosmarrëveshjet për draftet, jo mosmarrëveshje teorike…Sipas 14 Janarit, ODIHR i kërkohet opinion për çeshtje të administrimit zgjedhor. Kërkohet opinion për drafte konkrete,” mësohet të jetë shprehur ndër të tjera Damian Gjiknuri.
Përfaqësuesit e Opozitës së Bashkuar i kanë dërguar OSBE/ODIHR-it 5 pyetje lidhur me propozimet e Partisë Socialiste socialisteve për ndryshimin e rregullave zgjedhore sa i përket koalicioneve parazgjedhore.
Opozita i kërkon ekspertëve të ODIHR-it, nëse dispozitat aktuale janë në përputhje me standardet ndërkombëtare dhe si ndikon hapja e listave në formulën e koalicioneve.
Ata pyesin gjithashtu nëse cënohet cilësia dhe besueshmëria e zgjedhjeve nëse rregullat ndryshohen 6 muaj para dhe në mënyrë të njëanëshme./ Opinion.al
LEXO EDHE: Zgjedhjet dhe koalicionet/ Opozita i drejtohet OSBE/ODIHR-it me 5 pyetje
