Tensioni ka arritur kulmin mes Putin dhe Erdoganit. Sot Ministria e Mbrojtjes ruse ka akuzuar Erdoganin se ka lidhje me ISIS dhe kryen tregti ilegale nafte me ta. Madje rusët deklarojnë se kanë prova që e mbështesin këtë gjë. Akuzat janë bërë gjatë një takimi të krerëve të qeverisë ruse ku ishin të pranishëm edhe gazetarët.
“Konsumatori kryesor i naftës së vjedhur nga xhihadistët në Siri dhe Irak është Turqia”, tha zv/ministri i Mbrojtjes Anatoly Antonov.
“Në bazë të informacioneve që kemi Erdogan dhe familja e tij janë përfshirë direkt në këtë tregti ilegale”, shtoi ai. Sipas zyrtarëve rusë Turqia blen 200 mijë fuçi naftë çdo ditë nga ISIS duke u dhënë rreth 2 miliardë në vit xhihadistëve. Ata shtuan se Turqia u ka dhuruar 120 tonë municione xhihadistëve dhe 250 mjete transporti. Zyrtarët rusë kanë demonstruar para gazetarëve edhe foto nga rrugët e kalimit të naftës për në Turqia.
