Në një kohë kur tensionet në Gjirin Persik janë të larta dhe Arabia Saudite ka miratuar hyrjen e trupave ushtarake amerikane, Kremlini njofton se Presidenti rus, Vladimir Putin do të vizitojë sot Riadin
Vizita e tij, që synon rritjen e investimeve në ekonominë e Rusisë, vjen në kohën kur Moska ka dështuar që të përmbushë premtimin për rritje 3 për qind të prodhimit të brendshëm bruto dhe po vazhdon të përballet me sanksione perëndimore.
Nafta do të jetë “pika kryesore e diskutimit” në mes të Putinit, Mbretit saudit Salman dhe princit saudit, Mohammad bin Salman.
Rusia ka punuar ngushtë me Organizatën 24-anëtarëshe të vendeve eksportuese të naftës (OPEC), të udhëhequr nga Arabia Saudite, për të rritur çmimin e naftës dhe për të kufizuar furnizimin, pas uljes së çmimit të naftës më 2014, që ka dëmtuar ekonominë ruse.
Rusia nuk është anëtare e OPEC-ut, mirëpo marrëveshja aktuale e grupit do të skadojë në pranverën e ardhshme.
Para vizitës së tij, Putin ka dhënë intervista për mediat, Al Arabiya, Sky News Arabia, nëpër të cilat ka përmendur marrëdhëniet e mira me mbretin dhe princin saudit.
Analisti politik, Fyodor Lukyanov ka thënë se Putin mund të shfrytëzojë ndikimin e tij për ulje të tensioneve në mes të Teheranit dhe Riadit, pas sulmeve në disa rafineri të naftës në Arabinë Suadite, për kryerjen e të cilave është fajësuar Irani.
Irani në anën tjetër ka mohuar çdo përfshirje në këto sulme. /Opinion.al
