Rusia ka provokuar një atmosferë Lufte të Tretë Botërore këtë të premte, duke përshkuar kanalin e La Manshit me flotën e saj luftarake, e drejtuar për në Siri. Moska shton ndjeshëm në këtë mënyrë praninë e saj ushtarake në Mesdhe, duke vënë në alarm fuqitë perëndimore.
Kremlini urdhëroi flotën të kalojë përmes ngushticës që ndan Francën me Britaninë e Madhe, një prej kanaleve më të frekuentuar në botë nga linjat civile e ato tregtare. Një koloni e plotë me luftanije e kryesuar nga aeroplanmbajtësja “Admiral Kuznetsov” iu drejtuan Mesdheut perëndimor. Të paktën 50 avionë luftarakë e helikopterë arrin të mbajë aeroplanmbajtësja e ndërtuar në vitin 1985. Të vëna në gjendje alarmi luftanijet britanike dhe ato të NATO-s, shoqëruan flotën ruse përgjatë gjithë zonës së rrezikut.
Në Bruksel, në ditën e parë të Samitit Europian, liderët e bllokut nuk mundën të dalin në një deklaratë të përbashkët për Rusinë, sa i përket atyre që konsiderohen si krime nga kjo e fundit dhe regjimi i presidentit Assad në Siri.
Edhe pse një retorikë e ashpër kundër bombardimeve ruse ka kohë që artikulohet nga disa liderë europianë, unioni nuk ka vendosur ende të penalizojë Moskën me sanksione. Ishte Italia ajo që doli kundër propozimit të Britanisë, Francës e Gjermanisë për penalizime ndaj Rusisë. Nevojitet më shumë unanimitet, ka deklaruar presidenti i Parlamentit Europian, Martin Schulz.
Presindeti i Parlamentit Europian: “ Sipas meje nuk ka hapësirë për sanksione të tjera, për të cilat duhet më shumë unanimitet.”
Në takimin që zgjati deri në mesnatë janë diskutuar shkeljet e hapësirës ajrore të BE-së nga Rusia, fushatat desinformuese ruse, sulmet kibernetike dhe ndikimi i Rusisë në proceset politike në BE dhe më gjerë.
Tv Klan
