Presidenti rus Vladimir Putin i shprehu mbështetjen liderit të republikës Sërpska në Bosnje dhe Hercegovinë, gjatë një takimi të zhvilluar në kuadër të forumit ekonomik ndërkombëtar që mbahet në Shën Petërsburg.
Sipas Dodik, Rusia kishte shprehur zhgënjimin e thellë me atë që i quajti mungesë partneriteti dhe marrëveshjet me perëndimin. Dodik, i cili njoftoi se do ta mbante së shpejti një referendum për shkëputjen e Republikës Serpska nga Bosnja, pohoi se Moska qëndron prapa përpjekjeve të RS për të respektuar Marrëveshjen e Dejtonit përballë përpjekjeve të perëndimit për të shkatërruar atë.
“Perëndimi abuzoi me vullnetin e mirë të Rusisë për të ruajtur stabilitetin dhe paqen”, tha Dodik, i cili sinjalizoi gjithashtu përkrahjen e Putinit, lidhur me rezolutën për Srebrenicën. Lideri i Republikës Serpska, njoftoi gjithashtu se kishte informuar Putinin për mbajtjen e Kuvendit të Botës serbe.
“Atje do të tregojmë unitet dhe do të bëjmë një deklaratë të rëndësishme. Putin e përshëndeti popullin serb”.
Forumi ndërkombëtar ekonomik i San Peterburgut, i themeluar si një dritare për në Europë, pret tani vetëm liderë të shteteve të Azisë, Afrikës dhe Amerikës Latine tek të cilët Putin ka orientuar ekonominë triliona dollarëshe.
Nuk janë vetëm Kina dhe Arabia Saudite, por edhe shtete si Zimbambve e Afganistani ku Moska synon të mbështetet ,teksa përfaqësuesit e këtyre vendeve zëvendësuan dikur investitorët europianë.
Në forum ishin të pranishëm edhe zyrtarë talebanë. Në një shenjë të dukshme të realitetit të ri, në stendat e disa bankave ruse u pa simboli I dragoit kinez, shprehje e varësisë në rritje të ekonomisë nga Pekini.
