Në një shfaqje të qartë mbështetjeje për Teheranin, Vladimir Putin priti sot në Kremlin ministrin e Jashtëm të Iranit, Abbas Araghchi.
Presidenti rus Putin dënoi ashpër sulmet amerikane ndaj Iranit, duke i quajtur “akte agresioni të pajustifikuara” dhe siguroi delegacionin iranian se populli i Iranit mund të mbështetet te Rusia.
Një video e publikuar nga Kremlini tregon takimin e Putin me delegacionin iranian në një sallë luksoze, i shoqëruar nga ministri i Jashtëm Sergey Lavrov dhe këshilltari i lartë Yuri Ushakov, ish-ambasador i Rusisë në SHBA.
“Ky akt agresioni kundër Iranit nuk ka asnjë bazë apo justifikim. Ne kemi marrëdhënie miqësore dhe të besueshme prej shumë vitesh me Iranin, dhe nga ana jonë po bëjmë përpjekje për të mbështetur popullin iranian”, deklaroi Putin.
Gjatë fjalës së tij, Putin deklaroi se Shtetet e Bashkuara janë provokuar nga Izraeli për të ndërmarrë sulmet ndaj Iranit.
Putin tha gjithashtu se ka zhvilluar telefonata me Presidentin amerikan Donald Trump, Kryeministrin izraelit Benjamin Netanyahu, Presidentin e Emirateve të Bashkuara Arabe Mohammed Al Nahyan dhe Presidentin e ri të Iranit, Masoud Pezeshkian.
Megjithatë, nuk u dhanë detaje për kohën e këtyre bisedave, ndërsa Kremlini kishte deklaruar të dielën se nuk kishte ndonjë plan për të folur me Trump pas sulmeve amerikane.
Araghchi falenderoi Putinin për qëndrimin mbështetës dhe deklaroi se “Rusia është në anën e duhur të historisë”. Ai vlerësoi gjithashtu afërsinë mes dy vendeve, e cila sipas tij “është forcuar edhe më shumë vitet e fundit”. Irani ka qenë një nga mbështetësit më të fortë të Rusisë që nga nisja e pushtimit të Ukrainës në vitin 2022. Regjimi iranian ka furnizuan Moskën me armë, përfshirë raketa balistike me rreze të shkurtër veprimi dhe mijëra dronë Shahed.
Sipas zyrtarëve amerikanë, Irani ka ndihmuar gjithashtu në ndërtimin e një fabrike dronësh në Rusi.
Në këmbim, Moska ka qëndruar pranë Iranit gjatë përplasjeve me Izraelin dhe pas sulmeve të fundit amerikane.
“Sa i përket programit bërthamor, Rusia ka qenë partnere dhe na ka ndihmuar. Po ashtu ka qenë pjesë aktive në negociatat bërthamore dhe ka luajtur një rol të rëndësishëm”, deklaroi ministri iranian Araghchi.
Rusia ka ndërtuar dhe vazhdon të operojë centralin bërthamor të Bushehrit në jug të Iranit, i vetmi central bërthamor i vendit.
Putin theksoi javën e kaluar se rreth 200 ekspertë rusë ndodhen aktualisht në objekt dhe falenderoi Izraelin që ka rënë dakord të “garantojë sigurinë e tyre”.
