Kremlini zyrtar ka akuzuar sot, liderin e opozitës, Alexei Navalnyn se po bashkëpunon me CIA-n. Kjo deklaratë vjen vetëm një ditë pasi Navalny u shpreh se Vladimir Putin ishte përgjegjësi për helmimin e tij.
Zëdhënësi, Dmitry Peskov, i hodhi poshtë akuzat e Navalnyt, duke i quajtur “të pabaza dhe të papranueshme” dhe shtoi se specialistë nga inteligjenca amerikane po punonin me Navalnyn këto ditë dhe i kanë dhënë atij udhëzime mbi çka duhet të thotë.
“Navalny po punon me shërbime sekrete të vendeve perëndimore”, tha Peskov.
Teksa fliste për gjermanen “Der Spiegel”, Navalny u shpreh se Putin fshihet pas helmimit të tij dhe e përshkroi momentin kur Novichok nisi të bënte efekt, si një çast kur nuk ndjen fare dhembje, por e kupton që po vdes.
Navalny doli nga spitali gjerman javën e kaluar, pas 32 ditësh trajtim, shumë prej të cilave i kaloi në koma./Opinion.al
