Presidenti rus Vladimir Putin ka thënë se ai do të preferonte si president të SHBA Joe Biden në vend të Donald Trump.
Kjo deklarata e tij vjen përpara zgjedhjeve amerikane të këtij nëntori.
Para kandidimit të parë të Trump për president në vitin 2016, Putin e kishte vlerësuar atë si “të shquar dhe të talentuar”.
Biden ka qenë një kritik i ashpër i Putinit për vite me radhë, duke e quajtur atë një “vrasës” përpara pushtimit të Ukrainës.
Duke folur për televizionin rus në një intervistë para kamerave të mërkurën, Putin tha se udhëheqja e zotit Biden do të ishte më e mirë për Rusinë sepse ai është një “politikan më me përvojë, i parashikueshëm, dhe një politikan i formacionit të vjetër”.
Ai hodhi poshtë pyetjet në lidhje me moshën dhe shëndetin mendor të zotit Biden dhe tha se kur ishin takuar për herë të fundit në vitin 2021, ai nuk kishte vënë re asgjë të veçantë.
“Edhe atëherë [tre vjet më parë] njerëzit thoshin se ai ishte i paaftë, por unë nuk pashë asgjë të tillë,” tha ai.
Putin sqaroi se Rusia do të punojë me këdo që “fiton besimin e publikut amerikan” dhe fiton presidencën.
