Ish-kancelarja gjermane Angela Merkel ka vijuar të flasë për ngjarjet dhe episodet që shënjuan karrierën e saj politike dhe raportet me liderët e tjerë botërorë.
Këtë herë ajo është ndalur te vizita e vitit 2007 në Soçi të Rusisë, ku Presidenti Vladimir Putin teksa e priti në takim, i nxori edhe qenin e tij të racës Labrador.
Putin tha javën e kaluar se ai nuk ishte në dijeni të fobisë së Merkelit ndaj qenve, por ish-liderja e Berlinit tha në një intervistë për CNN se kreu i Kremlinit mund ta kishte harruar vërtet frikën e saj, por vuri në dukje se ajo ende e sheh incidentin si një shfaqje force nga ana e Rusisë.
Kujtohet se pak ditë më parë, gjatë një vizite në Kazakistan , Putin u pyet për detajet e takimit me Merkelin në vitin 2007, duke theksuar se ai nuk e dinte që ajo kishte frikë nga qentë, por përkundrazi, ai donte të krijonte një atmosferë të këndshme, dhe kërkoi sërish falje nga ish-kancelarja.
“Në të vërtetë, ky incident i veçantë ka ndodhur. Zonja Merkel erdhi për të na vizituar. Qeni im (labrador) Connie doli aty në zyrë. Unë i thashë nuk e dija se ajo kishte frikë nga qentë. Nëse do ta kisha ditur, nuk do ta kisha bërë kurrë. Përkundrazi, doja të krijoja një atmosferë kaq të relaksuar dhe të këndshme”, u tha Putin gazetarëve, duke iu përgjigjur pyetjes nëse ai me të vërtetë kishte “shfrytëzuar frikën e Merkelit” për ta vendosur atë nën presion.
Ish-kancelarja vuri në dukje se strategjia e përdorur nga familja mbretërore britanike – “kurrë mos shpjego, kurrë mos u anko” – e ndihmoi atë të përballet me frikën e saj.
Merkel shtoi se ajo përfundimisht “i mbijetoi” takimit dhe qeni nuk e kafshoi atë.
“Ai mund të ketë harruar. Por nëse e lexoni të gjithë historinë, atëherë do të shihni se nuk ka gjasa që ai të ketë ditur diçka për të… Nuk ka shpjegim tjetër për këtë. Është fjalë për fjalë një përpjekje e vogël për të testuar ujërat, stabilitetin e një personi, forcën e tij. Në thelb, kjo është një shfaqje force”, shpjegoi Merkel.
