I vënë vazhdimisht nën akuzë për spiunazh dhe ndërhyrje në politikën ndërkombëtare përmes agjentëve të tij, presidenti i Rusisë Vladimir Putin është kthyer në kundërsulm. Ai ka akuzuar shërbimet e huaja të Inteligjencës për shtimin e aktiviteteve në Rusi, duke njoftuar se vetëm gjatë 2018, Moska zyrtare ka bllokuar punën e rreth 600 spiunëve.
Putin nuk preferoi të ndalet në detaje, por tha se “129 anëtarë të stafit dhe 465 agjentë të shërbimeve speciale të huaja janë penguar në veprimtaritë e tyre”. Në fjalimin e tij para zyrtarëve të shërbimit rus të sigurisë (FSB), Putin u ka kërkuar të jenë efikas, sidomos kur bëhet fjalë për mbrojtjen e të dhënave sa i përket zhvillimit të sistemeve të armëve.
“Ne kemi parë agjenci të huaja të inteligjencës që kanë tentuar të rrisin aktivitetin e tyre kundër Rusisë, duke tentuar në të gjitha forcat që të kenë qasje në informacionet politike, ekonomike, shkencore dhe teknologjike”, ka thënë ai.
Spiunët rusë janë akuzuar nga palë të tjera për komplote të ndryshme, duke përfshirë helmimin e ish-agjentit rus, Sergei Skripal dhe vajzës së tij në Sallsbëri të Anglisë. Zyrtarë të inteligjencës holandeze, çeke dhe suedeze kanë thënë se kanë parandaluar një varg sulmesh.Rusia po ashtu është akuzuar nga Perëndimi për ndërhyrje në proceset zgjedhore, përfshirë edhe Presidencialet në SHBA. Të martën, presidenti i Këshillit Evropian, Donald Tusk, paralajmëroi se “forcat anti-evropiane” mund të shënjestrojnë zgjedhjet e Parlamentit Evropian në muajin maj./B.K Opinion.al
