Rusia nuk ka ndër mend që t’i çmontojë e para raketat me rreze të mesme të ndaluara nga traktati INF, por nëse Shtetet e Bashkuara do të vendosin raketat e tyre në Europë, Rusia do të kundërpërgjigjet për të mbrojtur sigurinë e saj kombëtare. Kështu është shprehur Vladimir Putin këtë të mërkurë në fjalimin e mbajtur përpara dy dhomave të parlamentit rus.
Presidenti Putin tha se Shtetet e Bashkuara kanë në plan zhvendosjen e raketave, në mënyrë që të jenë në gjendje për të goditur Rusinë brenda 10-12 minutave.
Gjithsesi ai tha se Rusia është gati të diskutojë çarmatimin, por “Teksa presim që të njëjtën gadishmëri ta kenë edhe partnerët tanë, do të vazhdojmë të zhvillojmë planin tonë ushtarak.”
Në fillim të muajit shkurt, administrata e Trump pezulloi marrëveshjen e firmosur nga presidentët Reagan dhe Gorbaciov për të ndaluar përdorimin e raketave bërthamore me rreze të shkurtër dhe të mesme.
Kjo lëvizje u justifikua nga presidenti i Shteteve të Bashkuara pasi “Moska e ka dhunuar për shumë kohë traktatin.” Marrëveshja u pezullua më 2 shkurt dhe Shtepia e Bardhë është gati që pas gjashtë muajsh të tërhiqet në mënyrë të njëanshme nga marrëveshja, vetëm nëse Rusia nuk zotohet për respektimin e marrëveshjes.
Kjo lëvizje është mbështetur nga NATO, edhe pse Bashkimi Europian druhet se mund të shpërthejë një konflikt i ri, i cili mund të rrezikojë sigurinë e Kontinentit të Vjetër.
