Pasi Gjykata e Tiranës vendosi të pushojë çështjen ndaj kreut të PD, Lulzim Basha, Arben Ristanit dhe Ilir Dervishit ka ardhur dhe reagimi i kreut të grupit parlamentar të Partisë Socialiste, Taulant Balla.
Lexo edhe: “Lobimi rus”/ Gjykata pushon çështjen ndaj Bashës dhe zyrtarëve të PD-së
Ai e ka cilësuar si një teatër të turpshëm vendimin e Gjykatës dhe ka sugjeruar hapat që sipas tij duhen ndjekur për të hedhur dritë mbi këtë dosje.
Në një postim në faqen e tij zyrtare në Facebook, Balla ka kërcënuar drejtpërdrejtë prokurorin dhe gjyqtarin e çështjes duke përmendur procesin e vettingut dhe duke i akuzuar si pjesë e asaj që kryeministri quan “grupi KÇK”.
Ai shton se çështja duhet apeluar dhe se duhet marrë në pyetje përfituesi i parave, lobisti Nik Muzin.
“Kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim.
Kjo nuk është një çështje vetëm e drejtësisë shqiptare.
Nxitimi i stimuluar i ndonjë prokurori dhe gjyqtari që nuk e ka kaluar procesin e vettingut dhe që zbaton parimin “kap çfar të kapësh”, shfaqën sot këtë teatër të turpshëm për sytë e shqiptarëve dhe jo vetëm.
Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë.
Apelimi i këtij vendimi absurd dhe rikthimi i çështjes për hetim të plotë duke dhënë edhe garancitë nga Gjykata për marrjen në pyetje të përfituesit të parave Nik Muzin, janë hapat e vetëm për të hedhur dritë e për të bërë drejtësi në këtë dosje të rëndë”, shkruan Balla. /Opinion.al
