Në vitin 2024, shqiptarët udhëtuan më shumë se kurrë. Sipas INSTAT, mbi 4.4 milionë udhëtime u kryen nga banorët mbi 15 vjeç, si brenda ashtu edhe jashtë vendit. Pjesa dërrmuese, rreth 98%, ishin për arsye personale.
Referuar të dhënave, rreth 3 milionë udhëtime personale u regjistruan në territorin shqiptar, me synim kryesor pushimet dhe kalimin e kohës së lirë.
Muajt më të preferuar për të udhëtuar ishin gushti, dhjetori dhe korriku, duke reflektuar sezonin veror dhe festat e fundvitit si periudhat më të frekuentuara.
Destinacionet më të vizituara ishin Tirana me 15.4% të udhëtimeve, e ndjekur nga Vlora me 12.3%, Korça me 10.9% dhe Durrësi me 8.6%. Qytete të tjera si Berati, Shkodra dhe Gjirokastra tërheqin gjithnjë e më shumë vizitorë vendas.
Pjesa më e madhe e udhëtimeve u realizua për pushime familjare, ndërsa qëndrimet në hotele janë rritur ndjeshëm, çka tregon një përmirësim të infrastrukturës turistike.
Në total, qëndrimet mesatare kanë qenë rreth 4 net, duke reflektuar një interes më të qëndrueshëm për të eksploruar vendin.
Turizmi i brendshëm po kthehet në një motor të fuqishëm të zhvillimit lokal, duke nxitur ekonominë dhe promovuar bukuritë shqiptare.
Tv Klan
