Duke filluar nga data 1 shkurt qeveria do të nisë aksionin për ndërprerjen e lidhjeve të paligjshme të ujit. Pikërisht dje, zv/ Ministri i Energjitikës, Hantin Bonati, pati një takim me prefektët e 12 qarqeve në vend ku u kërkoi të monitorojnë gjatë aksionit grupet e ngritura të punës, të cilët do të shkëpusin të gjitha lidhjet informale si dhe do të informojnë për qytetarët që do të tentojnë t’i lidhin sërish do të ndiqen penalisht.
“Duhet kujtuar që 1 shkurti është data kur do të nisë aksioni derë më derë dhe çdo ndërhyrje do të penalizohet, sikundër e parashikon ligji”, tha Bonati.
Fillimisht në fokus të aksionit do të jenë institucionet buxhetore, biznesi e më pas qytetarët. Bonati u ndal edhe te kontrolli që duhet bërë ndaj institucioneve publike dhe nëpunësve të administratës.
Reforma e ujit do të përfshijë edhe formalizimin e puseve të ujit që janë hapur nga qytetarët apo bizneset. Në Kuvend kanë mbërritur ndryshimet e ligjit për burimet ujore, ku propozohet që të gjithë ata qytetarë që kanë hapur puse për shfrytëzimin e ujërave nëntokësore t’i formalizojnë.
Projektligji parashikon 6 muaj afat për formalizimin e puseve të hapura, në rast të kundërt, qytetarët apo bizneset që i shfrytëzojnë ato në formë informale do të gjobiten. “Afati, brenda të cilit subjekteve do iu jepet e drejta e formalizimit, do të jetë brenda 6 muajve nga data e hyrjes në fuqi të ligjit. Subjektet që vetëdeklarojnë veprimtarinë e tyre brenda afatit të përcaktuar, nuk do të ndëshkohen për kundërvajtjen administrative të kryer”, thuhet në relacionin e projektligjit.
