Gjykata e Vlorës ka vendosur ligjshmërinë e masës së sigurisë “Arrest me burg” për 47-vjeçarin Bardhosh Mino (Lytaj) i cili ra në prangat e policisë dy ditë më parë, pasi ishte i shpallur në kërkim për disa vepra penale.
Mino është dënuar me burgim të përjetshëm në Greqi, për vrasjen e dy turistëve anglezë në vitin 1998. Veç saj ai akuzohet edhe për trafikimin lënde narkotike të llojit kanabis dhe arratisje nga burgu grek.
Ndonëse ishte i shpallur në kërkim prej tre vitesh ai punonte si polic privat. Seanca u zhvillua me dyer të mbyllura.
Gjatë marrjes në pyetje 47-vjeçari ka shfaqur shenja nervozimi duke theksuar se nuk kishte dijeni që ishte i shpallur në kërkim: “Kam kryer burg në Greqi. Nuk e dija që isha në kërkim. Jam martuar, madje jam edhe me fëmijë.”
Seanca gjyqësore u drejtua nga gjyqtarja Herila Cela ndërsa prokuror i çështjes ishte Saimir Smaka./Opinion.al/
