Punonte në të zezë/ Trupi i masakruar në Landfilin e Sharrës, në pranga përgjegjësit e impiantit

Kanë mbërritur arrestimet e para që lidhen me ngjarjen e rëndë të dy ditëve më parë, ku një i ri 17 vjeçar, u gjet i masakruar në Landfilin e Sharrës. Policia e Tiranës ka vënë në pranga shtetasit Edmond Kollari drejtues eskavatori, Bujar Daja 45 vjec përgjegjës i punonjësve, Besnik Braha përgjegjës i firmës, Dëfrim Hakrarama Përgjegjës turni si edhe ka shpallur në kërkim shtetasin E.T me detyrë administrator i firmës “3K Sh. P. K”. Ardit Gjoklaj u gjet i pajetë mëngjesin e djeshëm në Landfilin e Sharrës. Mjekësia Ligjorë konstatoi se në trupin e tij kishte shenja prerje të thella në kokë dhe në gjymtyrë çka të le të dyshosh se i riu është goditur gjatë punës në Landfil nga makineria. Në momentin e gjetjes së trupit ai kishte në duar doreza dhe në trup mbante të veshur një mushama, çka lë të kuptohet se ka qenë në marrëdhënie pune në këtë impiant të përpunimit të mbetjeve urbane. Një nga akuzat që mund të rëndojë mbi drejtuesit e firmës që merret me menaxhimit e Landfilit të Sharrës është punësimi në të zezë i 17 vjeçarit, i cili nuk e kishte mbushur moshën për të punuar. Çka vërtetohet edhe nga policia e cila informon se Ardit Gjoklaj ishte i paregjistruar në firmën ”3K Sh p, k”.