Punonjësit shqiptarë janë më të stresuarit, vetmuarit dhe trishtuarit në Ballkanin Perëndimor sipas sondazheve të kompanisë amerikane Gallup.
Në raportin e publikuar së fundmi rezulton se 46% e punonjësve në vendin tonë në vitin 2024 kanë pohuar se përjetojnë stres të përditshëm në punë.
“Reflekton një të vërtetë reale që modernizimi apo standartizimi i shumë sipërmarrjeve ka problematika të thelluara që demotivojnë punonjësit, nuk japin atë që i takon dhe kanë sisteme të munguara të promovimit të brendshëm në karrierë”, tha Erion Muça, ekspert punësimi.
“Stresi në vendin e punës nuk është një ndjesi e përkohshme, por një ndjesi që e shoqëron punonjësin në një kohë të gjatë, gjë që sjell pasoja në përqendrim, motivim, dhe ne vendimmarrje”, tha Anora Kroj, psikologe.
Në kontinentin Europian Shqipëria renditet e dyta pas Qipros Veriore për përqindjen më të lartë të punonjësve që përjetojnë vetmi të përditshme në punë, me 19%.
“Do duhet të rritet niveli i pagës në mënyrë progresive, mbi bazën e përvojës dhe eksperiencës më mënyrë automatike, kjo duhet normohet”, tha Muça.
“Mos të fokusohemi vetëm tek nevojat materiale. Ka ardhur koha të mendohet për një siguri emocionale. Është shumë e rëndësishme që psikologu të jetë pjesë e çdo strukture ku ka punonjës, të kemi parandalim të këtyre ndjesive”, tha Kroj.
Kjo situatë reflektohet tek dëshira për ta ndryshuar vendin e punës, pasi 36% e punonjësve shqiptarë mendojnë ta lënë punën aktuale dhe janë në kërkim të vazhdueshëm për një mjedis tjetër./ Tv Klan
