Një operacion kundër kultivimit të kanabisit, ka vënë nën hetim edhe disa punonjës të policisë. Hetimi po kryhet nga Prokuroria dhe Shërbimi për Çështjet e Brendshme dhe Ankesat, në Ministrinë e Brendshme, pas zbulimit të disa parcelave me mbi 17 mijë rrënjë kanabis sativa në Kolonjë.
Policia njoftoi zyrtarisht se në operacion është përfshirë edhe Shërbimi i Çështjeve të Brendshme, një strukturë që heton vetëm shkelje ligjore të Policisë së Shtetit.
Zyrtarisht nuk bëhet e ditur të ç’niveli janë punonjësit e policisë që po hetohen, as nëse kanë patur dijeni dhe s’kanë vepruar apo po kanë bashkëpunuar me grupet e narkotrafikut.
Disa burime të besueshme i thanë Televizionit Klan se janë disa efektivë të policisë së Ersekës dhe Korçës.
Në operacionin për asgjësimin e parcelave me kanabis, të mbjella në një zonë të pyllëzuar në fshatin Qiman – Radovickë, morën pjesë Forcat e Ndërhyrjes së Shpejtë të Tiranës.
Përfshirja e Shërbimit të Çështjeve të Brendshme dhe Ankeasave, vjen në një kohë kur Prokuroria për Krimet e Rënda po verifikon një material të SHISH, pikërisht mbi dyshimet se punonjës të policisë janë të lidhur me grupet kriminale që kontrollojnë kultivimin dhe trafikimin e kanabisit.
Tv Klan
