Behgjet Pacolli është një nga biznesmenët më të suksesshëm, i cili ka investime në shtete të ndryshme të botës, por jo gjithmonë ka qenë i tillë.
Pacolli, i cili në daljet e tij televizive shpesh ka folur mbi rrugëtimin e tij drejt suksesit në biznes, ka zgjedhur që të ndajë me ndjekësit e tij në “Facebook” një foto të viteve ’70.
Krahas fotos, Pacolli shkruan se ajo është bërë në Hamburg, në kohën kur nuk i ishte futur ende investimeve në biznes, por kur bënte punë të rënda për të paguar studimet e tij dhe për të ndihmuar familjen në Kosovë.
Edhe pse tashmë është një biznesmen me investime të shumta, Pacolli thotë se nuk e ka harruar ndjenjën se si është të jetosh dhe të punosh në emigracion.
“Rrugës për në punë, gjatë viteve të 70-ta në Hamburg. Punoja punë të rënda fizike për të financuar studimet e mia. I vetmuar, mbajta familjen time të madhe në Kosovë. Unë e di ndjenjën e të jetuarit në vend të huaj”,-shkruan Pacolli./ Opinion.al
