Në fshatin Rrotull të Ishmit, shumë afër vendit ku u rrëzua avioni italian një javë më parë është kapur një furgon që transportonte 13 persona të punësuar për pastrimin dhe tharjen e kanabisit.
Arrestimi i tyre ka çuar në zbulimin e punishtes ku përpunohej kanabisi dhe ku u gjetën edhe 300 kg bimë narkotike.
Lajmi u bë i ditur nga Policia e Durrësit e cila tha se “filloi proçedimi penal në ngarkim të shtetasit A.Ll. 32 vjeç, banues në Hamallaj, Durrës. Shtetasi i mësipërm, në fshatin Rrotull, Ishëm është kapur me një mjet furgon me targa AA 039 BK, me 13 shtetas (punëtorë), të cilët punonin në pastrimin dhe tharjen e bimëve narkotike në banesën e shtetasit B.A”
Policia njoftoi se “gjatë kontrollit të ushtruar në banesën e shtetasit B.A. në fshatin Rrotull, u gjet dhe iu sekuestrua në cilësinë e provës materiale rreth 300 kg lëndë narkotike kanabis. B.A. , 47 vjeç, tashmë është shpallur në kërkim, pasi rezultonte banor i një fshati tjetër, i Kërtushajt të Ishmit.”
Fshati ku u gjet punishtja është 3 km larg grykëderdhjes së lumit Ishëm, ku një javë më parë ra avioni i pilotit italian Guido Guidi i cili dyshohet per trafik droge.
