Kryetari i Partisë Demokratike Lulzim Basha, ka zhvilluar një takim me qytetarët e Malësisë së Madhe, ku është shprehur se shqiptarët dhe Europa e dinë që pushteti i Edi Ramës ka mbaruar.
Basha tha se qeveria “Rama”, ka instaluar në Shqipëri diktaturën e hajdutëve dhe ka nënvlerësuar punën dhe meritën e qytetarëve.
Kreu i selisë blu, tha para qytetarëve të Malësisë së Madhe se rruga e vetme për zhvillim dhe punësim në Shqipëri është largimi i kryeministri Edi Rama.
“Punët po shkojnë keq e më keq. Drama më e madhe është rritje e frikshme e numrit të të larguarve. Malësia i ka pasuritë e saj. Ka njerëz të punës, sepse kanë ditur të kthehen në pionerë të kultivimit të shitjes së bimëve medicina le.
Para dy muajsh isha në Hot tek dajët e mi dhe ajo që pashë me trishtim të madh ishte mbyllja masive e shkollave. Asnjë vend nuk bëhet si vendi yt. Po pse nuk mundemi të ndërtojmë këtu në vendin tonë një të ardhme të sigurtë dhe të krijojmë mundësi më të mira. Shqipërinë dhe pasuritë e saj përrallore, shteti dhe çdo institucion i kanë futur në kllapa 5 njerëz.
Edi Rama ka instaluar një diktaturë të re, jo staliniste e marksiste por diktaturën e hajdutëve dhe të kriminelëve. Aty ku janë këto, nuk nderohet puna e të ndershmit. Këto janë arsyet se pse të rinjtë largohen. Regjimi i Edi Ramës është një regjim i mbaruar politikisht, prandaj vërtitet si kufomë politike dhe nuk di se çfarë flet. Ai është një njeri i mbaruar politikisht në sytë e shqiptarëve dhe të botës.
Beteja jonë është për ta shembur këtë sistem. Historia e Europës dhe e gjithë botës na tregon se cili është fundi i kësaj beteje. Ejani miq, ta përqafojmë këtë ndryshim dhe të çlirojmë vendin nga kjo bandë dhe të hedhim themelin e një shoqërie europiane. Të gjithë të çajnë përpara sipas mundësive dhe potencialeve që ato kanë. Tani të gjejmë më të mirën brenda nesh dhe të krijojmë parlamentin e popullit”, tha Basha./ Opinion.al E.Xh.
