Policia e Shteti ka bërë një bilanc të punës së kryer gjatë një jave. Në 7 ditë janë zhvilluar 10 operacione për goditjen e rasteve të kultivimit të bimëve narkotike, 6 operacione për goditjen e rasteve të armëmbajtjes pa leje/lëndëve eksplozive dhe 19 të tjera për goditjen e veprimtarive kriminale në fusha të ndryshme.
- Gjatë kësaj jave janë arrestuar, proceduar dhe shpallur në kërkim 430 shtetas, nga këta: 108 janë arrestuar, 308 janë proceduar penalisht dhe 14 janë shpallur në kërkim.
- Janë kapur në total 31 persona në kërkim, nga të cilët: 24 në kërkim kombëtar dhe 7 në kërkim ndërkombëtar.
- Janë zhvilluar 35 operacione policore të koduara: “Fuel”, “Ruger”, “Driving”, “Explode”, “House”, “Bongu”, “Receiver”, “Premtuesi”, “Pickpockets”, “Vapori”, “2nd Necklace”, “Fati i lojërave”, “Krasta”, “July”, “Bruz-Mali”, “Harta”, “On time”, “Last night”, “Road Guard 31”, “Road Guard 32”, “Road Guard 33”, “Procesi”, “Palçi”, “Cancel”, “Tenderi”, “Perimetri 181”, “Perimetri 182”, “Bypass”, “Brothers”, “Finish”, “Interaction”, “Levani”, “Harresa”, “Pulti” dhe “Continues”.
Si rezultat i kontrollit të pandërprerë të territorit, në të gjithë vendin, për goditjen e veprimtarisë kriminale të kultivimit të bimëve narkotike, janë finalizuar:
- Operacioni “Pulti”/Shkodër – 250 forca policore kontrolluan territorin dhe asgjësuan 4200 bimë narkotike të kultivuara në zona të pyllëzuara, pas gjetjes së koordinatave të regjistruara nga monitorimi ajror i GDF-së dhe nga dronët e Policisë vendore;
- Operacioni “House”/Tiranë – U arrestuan babë e bir që kultivonin bimë narkotike në ambientet e banesës së tyre dhe e përgatitnin lëndën narkotike në doza, gati për shitje;
- Operacioni “Palçi”/Tropojë – U arrestuan babë e bir që kultivonin bimë narkotike, në afërsi të banesës së tyre;
- Operacioni “Continues”/Mirditë – U arrestuan babë e bir që kultivonin bimë narkotike, në ambient të hapur;
- Operacioni “Krasta”/Krujë – U vu në pranga një shtetas që kishte kultivuar bimë narkotike në Krastë dhe një shtetas tjetër që qarkullonte me armë zjarri, në automjet.
Për goditjen e veprimtarisë kriminale në fushën e armëmbajtjes pa leje janë zhvilluar edhe 6 operacione të tjera:
- Operacioni “Ruger”/Tiranë – U sekuestruan 7 armë zjarri, 4 silenciatorë, municion luftarak, lëndë narkotike, 2 radio si ato të Policisë dhe sende të tjera të paligjshme dhe u vunë në pranga 2 shtetasit që i mbanin në banesat e tyre;
- Operacioni “On time”/Sarandë – U arrestua në flagrancë një shtetas që theu masën “Arrest në shtëpi” dhe kërcënoi ish-bashkëshorten e tij dhe bashkëjetuesin e saj, me një armë zjarri që e mbante pa leje;
- Operacionet “Driving”, “Last night” dhe “Levani” – U arrestuan në flagrancë 3 shtetas që qarkullonin me armë zjarri, në automjete.
- Gjithashtu është finalizuar operacioni “Explode”, gjatë të cilit u arrestua një shtetas që transportonte 20 kallëpe me lëndë të dyshuar plasëse tritol dhe 2 kapsolla detonatore me përcjellës elektrik.
Për goditjen e veprimtarisë kriminale në fushën e krimit ekonomik dhe korrupsionit janë zhvilluar 4 operacione, ndërsa për goditjen e veprimtarisë kriminale të dhënies ndihmë për kalim të paligjshëm të kufijve janë zhvilluar 5 operacione.
- Si rezultat i kontrolleve masive, operacioneve dhe goditjeve nga DVP-të në qarqe, janë sekuestruar lëndë narkotike kanabis, kokainë dhe heroinë, fidanë dhe bimë kanabis, 17 radio si ato të Policisë, dorashka, 7 maska, dokumente të dyshuara të falsifikuara, targa të huaja, mallra kontrabandë, shuma të konsiderueshme parash, të përfituara nga veprimtaria kriminale, dylbi, 7 automjete dhe 12 aparate celulare.
- Në fushën e armëmbajtjes pa leje, janë evidentuar dhe goditur 13 raste dhe janë sekuestruar 11 armë zjarri, 4 silenciatorë, 20 kallëpe triloli, 1 elektroshok, dy kapsolla detonatore me përcjellës elektrik, armë të ftohta dhe municion luftarak.
- Janë goditur 7 raste të kundërshtimit të punonjësve të Policisë, si dhe janë ndjekur ligjërisht 42 raste të dhunës në familje.
- Janë evidentuar dhe goditur 30 raste të krimeve mjedisore, 2 raste të organizimit të lojërave të fatit dhe 10 raste të vjedhjes së energjisë elektrike.
- Në fushën e narkotikëve janë evidentuar dhe goditur 43 raste, ndërsa në fushën e krimit ekonomik janë evidentuar dhe goditur 16 raste.
- Janë evidentuar dhe goditur 5 raste të veprimtarisë kriminale me objekt zjarrvënien e qëllimshme dhe janë proceduar penalisht autorët e dyshuar.
Shërbimet e Policisë në të gjithë vendin janë të angazhuara për mbarëvajtjen e sezonit turistik dhe për t’iu ardhur në ndihmë turistëve, në rast nevoje. Shërbimet e Komisariatit të Policisë Tropojë u kanë ardhur në ndihmë 3 turistëve çek që kishin mbetur të bllokuar në një zonë me terren të thepisur dhe me mjegull. Pas disa orësh kërkime, turistët janë nxjerrë nga terreni i rrezikshëm dhe më pas janë transportuar në spital, në gjendje të mirë shëndetësore.
Policia Rrugore/Monitorim intensiv në të gjitha akset rrugore të vendit, duke përdorur flotën e re të automjeteve të pajisura me teknologjinë bashkëkohore, makinat inteligjente, Poliscan-in, dronin “edukues”, lexuesin automatik të targave, radarët automatikë të vendosur në flotën e automjeteve të reja, kamerat dhe mjetet e tjera të pauniformuara, me qëllim parandalimin e aksidenteve dhe rritjen e parametrave të sigurisë rrugore.
- Gjatë kësaj jave janë pezulluar 435 leje drejtimi, nga të cilat: 251 për qarkullim me shpejtësi mbi normat e lejuara, 79 për drejtim mjeti, nën efektin e alkoolit apo në gjendje të dehur dhe 105 për qarkullim në sens të kundërt e shkelje të tjera të Kodit Rrugor.
- Janë arrestuar 61 drejtues mjetesh, nga këta: 32 për drejtim mjeti, në gjendje të dehur dhe 29 për drejtim mjeti, pa leje drejtimi.
- Janë goditur nga Policia Rrugore e Tiranës, 4 raste të tentativës për të korruptuar punonjësit e Policisë Rrugore.
- Janë vendosur 14.952 masa administrative, për shkeljet që janë rrezik për përfshirje në ngjarje rrugore.
Policia Kufitare/Angazhim e përkushtim për përballimin me sukses të fluksit shumë të lartë në pikat e kalimit kufitar, në kuadër të sezonit turistik. Gjithashtu, vijojnë kontrollet me teknologjinë bashkëkohore europiane, për mjetet lundruese dhe argëtuese që përdoren gjatë sezonit turistik. Kontrolle të shtuara edhe në kufirin e gjelbër dhe në atë blu, me qëllim parandalimin dhe goditjen e trafikimit të lëndëve narkotike dhe krimeve të tjera ndërkufitare.
- Gjatë kësaj jave janë kapur 8 shtetas në kërkim, nga të cilët 4 në kërkim kombëtar dhe 4 në kërkim ndërkombëtar.
- Janë goditur 14 raste të tentativës për kalim të paligjshëm të kufirit dhe të dhënies ndihmë për kalim të paligjshëm të kufirit.
- Janë proceduar penalisht 2 shtetas, për veprën penale “Falsifikimi i dokumenteve”, dhe 3 të tjerë, për veprat penale “Trafikimi i narkotikëve” dhe “Trafikimi i mjeteve motorike”.
- Gjithashtu, janë goditur 2 raste të mitëdhënies dhe 1 rast i kontrabandës me mallra për të cilat paguhet akcizë.
