Punëtorët që janë gjetur dje në objektin në ndërtim e sipër në Mbrostar të Fierit në pronësi të Vladimir Çilotajt kanë thënë se aty nuk po ndërtohet laborator droge siç pretendon policia, por një pulari.
Policia ka shpallur në kërkim shtetasin Vladimir Çilotaj, ndërsa ka marrë në pyetje banorë të fshatit dhe njerëz që ishin duke punuar në objekt. Ata kanë thënë se Cilotaj i kishte punësuar për të ngritur një pulari. Gjatë kontrollit hetuesit gjetën bazë ushqimore për bagëtitë pasi në fermën e Vladimir Çilotajt në Mbrostar mbarështoheshin dhjetëra krerë lopë e derra. Sipas policisë ferma ishte vetëm maskim pasi aty do të përpunohet kanabis.
Pajisjet e gjetura të montuara në brendësi të magazinës dyshohet se do të përdoreshin për kultivimin dhe përpunimin e hashashit, ndërsa gomonia e gjetur në afërsi të fshatit Seman dyshohet do të përdorej për trafikimin e lëndës narkotike drejt Italisë, ka deklaruar policia, e cila dje njoftoi se e ka sekuestruar këtë objekt./Opinion.al
